人網執笠,萬里望花生係幕後黑手

因為怕班朋友問得太多,所以一次過預先答嗮所有可能問題,唔好嘥時間係聯誼活動上。

點解停咗筆咁耐又寫翻,當然唔係共產黨叫我收斂下啦,係設計Program到咗Workflow呢個位搞唔倒落去,幾個月都係零進展,咪無心情寫咯。點解寫翻,因為諗通咗啦,已經開始寫得出Program,心理壓力無咗,多謝關心。

人網執笠係一件好平常嘅商業決定,就係咁簡單,老蕭喺上星期五晚基本上講咗啦,至於唯一收益人就係時興隆,廉處應該立案調查老蕭同時興隆嘅關係。老實講,佢隻萬里望花生真系好啱香港人口味。首先再三申明利益:人網一早就block咗我個account,但係我一直都係欣賞老蕭嘅,好似我咁嘅case嘅人其實好多,都理解點解要被block。而人網係對香港有好大貢獻嘅,就好似一面透鏡,照出香港好人壞人。唔好去懷疑一個人做事背後動機,例如:唔好去懷疑救小悅悅個大嬸係唔係為咗博出名攞獎金,如果你真係咁諗,Sorry啦,你真係好賤格。呢啲中國人思維模式最好改改。老蕭搞人網係好單純嘅一件事,唔好去醜化。

老蕭當初搞人網目的,兩個字:好玩。一個每個月蝕十幾萬嘅‘事業’只能用好玩去解釋,如果唔係就係支持反革命架啦,同以前啲華僑支持孫中山推翻滿清政府差唔多架咋。當然,唔搞落去實質原因并唔係呢十幾萬咁簡單。佢個仔先大鑊,冰封俠睇住見財化水,唔比蕭定一玩。如果你係蕭定一,你會點對個老豆?會唔會出現前兩個星期啲家庭慘案?錢銀影響就係咁,唔大嘅。作為一個香港人做任何事係唔可以唔考慮家人嘅感受同對家人嘅影響嘅。搞革命唔係請客食飯,係要斷六親嘅。

金錢係好少嘅問題,另一個原因係無理由老蕭一個咁勁嘅人,搞個網站都要蝕本加嗎,會比人笑架!所以佢老人準備洗牌嚟過,小本經營,睇送食飯,正規啲搞,呢點非常贊成。但系重點係玩歸玩,唔代表要出埋錢比其他人玩,尤其是啲影響倒你人格嘅人。

最後當然係講主要原因,就係一般人分唔清人力同人網嘅關係,呢點好大鑊,發生啲乜嘢問題全部入埋老蕭數,autojoin咗。老蕭自己有時都口快講錯人力同人網兩個terms。一直以來人力嘅內部矛盾唔停咁影響人網嘅形象。老蕭等於出錢叫人吊自己,同啲上深圳鴨店師奶無咩分別。凍結咗”香港人網“嘅名,由零開始建立過係最好嘅方法。

咁講下點解人力咁敗家影響到老蕭,相信99%香港人係以為人民力量黃毓民黃洋達係等價嘅。不過黃毓民好愛皇上,被世間冠名皇上為毓民第三代轉世靈童。第一代靈童陶君行轉世失敗,反噬毓民收場。第二代靈童馬草泥,呢個人我根本唔覺得佢有料到,真係唔明佢個屎忽系唔系靚啲,老蕭同毓民都咁中意佢,最終都系因為無料到收場,佢最近附上301元帛金比毓民。到皇上喺選舉後自爆”唔認同人力“,大家已經覺得第三代靈童玩完架啦。咁呢啲靚仔永遠都系唔識得收口嘅,公開向人網開火,比個藉口老蕭轉營,我代表老蕭多謝你啦。

人力主席係劉嘉鴻唔係毓民,毓民專心做立法會同政治文宣工作,唔參與人力決策,不過有幾個大問題人力都同毓民有分歧。最慘係99%香港人都以為你毓民話事架啦,講唔請架播。所以毓民做嘅一切,就影響人力嘅形象。佢話支持人力嘅一切決定愛人力(係真嘅,起碼我信毓民為人),但系,”你愛國家,國家愛你嗎“呢個道理我諗毓民唔係太清楚。目前毓民處於一個兩難局面,就係社會唔容許你同時愛上人力同皇上,你只能事但揀一個,否則犯咗政治重婚罪。我咁講已經好客氣,完全無評論到兩邊邊個係衰人應該唔去愛(其實呢句已經係評論咗)。假如毓民同人力分手,手續最簡單,公開講一聲OK。但系同皇上分手就係牽涉到好多正規法律手續,因為佢地都系普羅政治學苑嘅懂事。而皇上嘅熱血公民係喺立法會選舉之前砌入咗去普羅嘅,當時唔知系唔系皇上自願定非自願,但系普羅比人入咗係一個事實,而到今日都無分開更加係事實中嘅事實。普羅原本係毓民同大嚿嘅心血,大嚿講咗皇上唔離開普羅佢就自己走人。毓民愛皇上嘅情況就等同于陳木勝嘅天若有情咁,吳倩蓮愛上咗個有型飛仔劉德華,點會有好結果架?但系呢兩個麻甩佬就一定可以做到肛裂犧牲嘅感人效果,呢點我保證。

咁多政治事件後,結論係,政治人物係無禁鐘仔嘅自由同無交朋友嘅自由嘅。如果毓民真系愛到分離唔倒嘅,唯一出路係接近零。到時普羅要執笠;人力一定逼你走架啦,你走人力都會執笠;咁你唔通去做熱血公民咩,班靚仔妥唔妥你個老嘢呀,你都唔好意思啦,閃開啦阿伯。如果真係玩到咁,我可以大膽肯定,毓民係最終得益者,因為佢個仔可能可以保外就醫即時放人。

最後奉勸大家,當人網執笠係一個商業決定就得啦,唔好猜度咁多,始終食咁多花生係無益嘅。

 

 

 

 

Topics: