622全民投票確實係唔夠完美

622全民投票內容確實係差咗幾條,如果可以加入幾條 option,咁就可以無懈可擊啦。縱使唔夠完美,都應該去投下嘅,好似台長否定嘅見解,實在好難令人信服。話說台長當日電話訪問戴耀廷,講唔服人聽眾亦唔太認同,睇到佢真係有啲無引。台長不離毓民一系列嘅理念(先報利益,毓民嘅理念我大部分都唔同意嘅,不過我支持佢架,因為佢仲有能力搞Q香港政府,佢搞唔倒嗰日我就唔支持架啦)。佢地來來去去都係執著唔夠全面、無法定性、有安全問題。一句講嗮,就係放唔低“鳩做”兩個字。喺人力同長毛嘅屎忽招之下,已經將佔中班粉腸夾到再無得鳩做啦。喺白鴿黨進退失據嘅情況下,如果大家再出啲力,應該可以夾死班乳鴿。其實白鴿黨想玩死班激進派,以為可以通過呃到佔中三子嗰三個白癡仔就可以再次華山論棍,一統民主派,點知殺出個金毛獅王,比人夾翻轉頭。之前仲懶高調對住光管發誓,依家佢地走又唔係,唔走又唔係,其實白鴿黨最希望毓民搞破壞,最好搞爛個全民投票,等佢地可以有藉口走頭,唔洗去中環瞓街,跟住去西環賣多次屎忽。

呢次全民投票係真係有啲唔完美。首先講安全問題,今次共產黨一定會出盡國家級網絡高手攻擊相關網站,同想盡辦法入侵。所以安全性係一個問題,因為差佬都會借啲依唔幫你。果然真係夠膽報警後拖半日先處理,仲話有呢啲事應該打999(咁阿KJ又叫人唔好隨便打!?)。其實唔單止投票網站會被入侵嘅,黑客係會大量入侵雲端服務器,今時今日咁多人用雲端,唔少都有安全漏洞。事因要借助呢啲雲端服務器有大bandwidth嘅優勢去做分散式攻擊(DDOS)。不過,我睇過啦,投票網站基本上都有一定嘅專業性,只係一個身份證資料喺上面應該唔係咩大問題。只要大家明白,願意冒一定嘅小風險,呢個問題馬上唔成問題。而一啲被中毒做咗砲台發攻擊嘅雲端服務器或私人電腦,係自身無做好防禦工事,怪唔得人咁多,因為其它真係惡意嘅黑客入侵,日日都有。甚至我有見過QQ群組上去買通人主動放木馬去公司服務器添,RMB2000一部。

其次係無法定性,一定無架啦。呢類投票嘅實質意義係比翻香港市民自己睇,香港人自身嘅“力”去到咩level。你去要求一個唔合法嘅政府去承認呢個投票嘅合法性,本身就係矛盾。同班眸利日日叫共產黨平反六四一樣,你一咁想就等於承認咗呢個政府。既然政府唔會出嚟做公投,你就點做都無問題,人多就等於合法,越多就越合法,法不治眾呀!公義係喺法律之上架台長。大家願意出嚟行公義比法律重要得多。人無公義,有法律都無用,大陸有板你睇。

最後,缺乏全面性,得嗰幾個option。呢個係我認為可以改善嘅地方。大家可以想想,option 無反對派方案,三個方案都係“小圈子”推選出嚟嘅,呢個問題好容易比建制人事挑機。所以我認為可以玩讓半球,加入“種子方案”,注意唔係湯渣嗰個,係民建聯嗰個。除咗反對你地嘅方案之外,大家更可以玩盡佢,加入一個【我認為此投票不合法】,跟著呼籲所有建制派支持者出嚟投,加大個投票率。喂!戴生,你唔係怕呢個option最多人投呀?係人都知“靚仔方案”贏Q硬架啦。你夠姜加入呢個option,可以100%堵住政府個口,政府成日講無法定效力,咁你咪叫人投呢個option咯。講明如果呢個option勝出,民主派以後唔搞民間投票,唔再搞公投,市民都唔支持咯,唔搞啦。咁如果佢地出嚟投,咁就即係承認咗呢個投票啦。如果無人揀呢個option,咁即係啲市民接受呢種投票方式啦。假如政府仲話呢個根本係無法定效力(注意,香港政府唔咁講非法嘅),咁咪叫政府搞一個投票咯,證明香港人唔接受公投咯,政府點答都死。

當然,喺缺乏全面性嘅情況下都只能選擇去投,因為大家好難再爭取到一個機會去觀照全香港嘅人心。反而喺咁簡單手續下,可以好有效點算一下香港人仲剩翻幾多有公民意識。注意,呢次投票內容係次要,重點係香港人仲有幾多個係講公義嘅一個統計。明白咗呢個道理就會放低嗮所有執著架啦。

 

Topics: