老蕭係唔係贊成功能組別呢

最近【最新蕭析】講到直接民主嘅弊端,當然!老蕭咁講原因得一個,就係說明毓民嘅不是,事關5月16日毓民【非法集結】判刑,喺求情時,比個法官問佢邊度有直接民主(我係毓民就答:有,喺台灣!)老蕭喺策略上需要同毓民劃清界線,要精心打造毓民成為一個衰人,我地都好理解。不過衰人并唔係做所有事都必然係壞事,希望大家理解呢個事實。咁毓民呢次公民抗命,準備要去受靶,都算係一件有意義嘅事。唔洗係又“小”,唔係又“小”嘅。老蕭若要話毓民係衰人,直接講事實就得架啦,同時應該警告同佢做朋友嘅人要小心就OK。老蕭佢老人家講咗兩個幾月,講到自己好似啲比性交轉運嘅神棍呃咗咁。

先講講老蕭直接民主呢單評論,你細心聽下就知道,老蕭為咗講毓民唔啱,微調咗“直接民主”嘅意義,講到好似瑞士咁,起個廁所都要“公投”係落後嘅。先進民主制度全部都係間接民主嘅,先講明,佢申述嘅理由係啱嘅,現今社會結構複雜,講求分工,已經唔可能每件大事諸如起高鐵咁,所有市民都有咁專業嘅知識去問乾坤。而更現實嘅原因係,一個講求效率嘅國家或地區係唔再可能要求所有市民浪費太多時間去處理各項重大政府決議(小事唔洗講,更加無時間)。呢啲都係“阿媽係女人嘅道理”,相信唔係毓民嘅原意。

不過老蕭為咗質死毓民,呢次小弟覺得over咗。因為字裏行間講到社會各項功能太複雜,太多專業問題必須要專業嘅人先可以處理,唔可能要好似佢老婆咁嘅人去做出專業決定。用呢個講法好有問題,因為太容易讓人聯想起立法會功能組別嘅存在係必要嘅。我強烈高調呼籲建制派甚至政府出嚟抽水。

講完正事,講翻啲恩怨情仇嘅始末,同大家研究下。首先,之前老蕭講毓民啲衰嘢,基本上都係講得啱嘅,如毓民係小人,人地幫過佢付出咗幾多佢係唔會記得嘅。毓民好記仇,為咗私人恩怨,佢隨時會公器私用。事關今次又想搞死劉嘉鴻,明顯就係人力同佢唔啱牙,佢就倒轉講劉嘉鴻廢柴。不過如果我係劉嘉鴻,一係就動議表决叫毓民(係叫整個普羅)離開人力,一係就自己辭職唔Q做主席,如果唔係,你劉嘉鴻就裡外不是人(佢真係幾廢)。仲有性女想去出選立法會,同慢B食飯講鬼故仲錄埋音(真係小人先做得出,自己人都咁玩),講咗有幕後高人話某前綫高層係共產黨買通。性女講嘅幕後高人,小弟如無估計錯誤,100%係毓民。毓民個人本質就係咁,物以類聚,五鬼纏身。你唔信呀?佢前日(5月16日)做節目先講道:我一日唔死都可能有第三鑊。

好似老蕭啱能嗮播!我都講咗,人網執笠係中性嘅,你地聽到嗰啲只係隨便搵啲理由姐(想唔倒咁多傻仔跟老蕭嘴去小毓民,high嗮)。明白嘅人就明白架啦。就算講到分手出惡言,都係中性,唔算係錯,不論在利益,道義上,都應該向大家講清楚好啲。當然,毓民啲臭歷史講得隱晦啲會好少少。要講老蕭錯,就只能夠講當初佢同毓民走埋一齊,搞MyRadio之後,開始以金錢換取毓民嘅“青春”,之後在幾次選舉中為咗毓民而同其他同路人反面(協助一代靈童上位),脫離咗自己嘅道德原則。喺毓民嘅性格缺陷構建歷程中注入咗唔少能量。

最後希望唔好出現有人抽水啦。雖然講到毓民咁賤格,但系我都會去支持毓民嘅,唔同佢做朋友就得架啦。香港需要佢去制衡政府,多啲人做佢啲咁嘅行為就真系可以制衡到政府架啦,呢個要睇香港人造化。

Topics: