香港民主有希望啦

諸位,香港民主終於露出生機啦!當然唔係靠毓民,更加唔會靠班【飯民】,昨日睇報紙居然話CCTVB套 【金枝慾孽II】收視率得10點!?哇!香港人醒覺啦,唔再睇啲白癡劇集啦。

小弟之前都已經講過,只要無線啲劇集仲可以出現40點收視,香港咪洗旨意有民主。不過,經過李國章先師推行多年嘅通識教育終於有成果啦,香港人好似慢慢蘇醒過嚟,真係唔講得笑。我多年前已經講過共產政權地方嘅任何一個課題係唔容許有兩個答案嘅,中央政府擁有絕對嘅解釋權。呢個解釋權仲係同時空有關,如當年批林批孔,今日可以有孔子和平獎,玩一年又話不承認啦,跟慢啲都死。唉!此乃民間所講嘅【亂搬龍門】,香港人要習慣下啦。

回說香港人點解會特然變醒咗,就係多得通識教育啦,咩都要人由多個角度去諗,仲要問埋啲時事問題,咁即係逼班靚仔去關心社會,邊會有極權政府咁笨架?你係要欺騙市民先可以提高管治效率架嗎。而無線嘅爛劇集就係最好嘅驗證指標,稍微有腦嘅人都唔會覺得啲咁嘅嘢睇得。除非你係唔講邏輯,不問是非,先有可能會接受倒。

僅此致謝李國章先師,救咗香港年青人。

Topics: